生菜包及雜項

你看我從前日子多寫意，空閒得做生菜包。做完出來還要技驚四座，幫碟菜影輯沙龍才心息。現在趕頭趕命完成一頓吃的，被梁生（口氣是疼惜，卻暗地裡嫌惡）叫我先去抹個臉才入座。係成面油架嘞，煮飯無油架？啲油唔會彈架？好似吳君如咁用塊布遮住成個頭咁煮飯呀？好似楊采妮咁有谷德超幫佢爆洋蔥呀？煮完個咖哩出黎仲係成個「但願你明白」玉女樣咁呀？

岔得遠咗，講番生菜包。冰箱裡滿是零星的肉碎、菜碎無人問津，冬菇浸多了，冬筍罐頭開了吃不完的時候，便是吃生菜包的最好時機。生米粉用大火炸至金黃，時間要掌握得準確，因為非常容易炸焦。盛起壓碎。豬肉剁碎醃好，與切粒芥蘭、冬菇、冬筍、蔥花，切茸蒜頭、紅蔥頭同炒香，糖、鹽、生抽、麻油略調味，倒入炸過的米粉碎兜炒，即成。材料可以隨意調較。


我這兩天都不太順心，左眼經常眼眉調。繼昨日的潑蠟事件，我包朱古力奶今天在書包裡爆開。好爆唔爆，在我懶勤力借了多本參考書與劇本，塞得書包滿滿時才爆。內裡的東西，包括圖書館的公物、筆記、銀包、梁生在日本給我買的一個手造包包無一倖免，全是朱古力奶印和味。白癡的我回來用熱水浸洗那個包包，它縮水（想用「竟然」二字，不過用熱水洗本來就有縮水的危機；我也知道，但白癡的我認為用熱水心理上較有消毒的效果）。唉，原本載鏡盒潤唇膏的包包現在變了做個散子包。