Skip to main content

窩蛋牛肉飯

好一個窩蛋牛肉飯,既可以是私房煲仔飯,又可以晉身「港式盲都識煮」系列。碎牛用糖、生抽、生粉、油及清水(慢慢分數次倒入)醃好。洋蔥切粒先炒至金黃(亦可加綠豆),再放入碎牛同炒至變色,加少許上湯及蠔油埋薄芡盛起。電飯煲煮白飯,待飯八成熟時,放入已炒牛肉蓋飯面同煮至飯熟(其實早點在飯起眼時把醃好未炒的碎牛放入電飯煲也行,連炒的步驟也可以省卻),撥開中間位打隻雞蛋,下甜豉油再焗兩分鐘即成。

麻煩一點用瓦煲的話,白米洗淨後要用溫水先浸十分鐘縮短煮熟時間,隔去水,然後大火放入已掃油的瓦煲裡,下米對水一對一(或水多少少)份量的滾水,轉中火開蓋煮至起飯眼,再轉小火,放入已炒好的碎牛合上蓋煮至米熟,打雞旦下蔥花即成(下完豉油再焗的步驟不能少,飯入味與否就靠這步)。汁料亦可以自己調,用油爆香花椒八角丟掉,油留起放入片糖煮至溶,下生抽及少許茄汁拌勻。

你看我的飯焦幾靚靚。不過梁生唔多欣賞,他認為窩蛋牛肉飯的牛肉應該是餅不是碎,我辯駁話我煮的是西式窩蛋牛肉飯,所以可以落青豆,他想吃的是中式,然後他話「咁你有無見過煲仔飯嘅西式窩蛋牛肉飯先?」,咩呀?無頭公案囉!(我醒起啦,他想吃的是蒸的盅飯,完全第二樣嘢喎。)

澄清:圖中所見我打散咗隻蛋,但現實生活中的我打蛋技術高超到可以跟做蠔餅單手開蛋的人媲美,只不過當天我寫文寫到傻咗一時失手嗟。

Comments

新鮮人 said…
我記得有人說過你有點『自戀』個啊? :p
啊澤 said…
啊寶姐,貢我唔識煮貢我係咪連盲都不如呀!?
kristie said…
fresh:其實我咁寫o個陣已經諗起嬲記既一席話,hohoh.

嬲:喂,就咁倒入電飯煲等個掣啪起就食得o個個我肯定你可以整到囉.
冬冬 said…
嘩﹐D飯焦好正呀! 我既至愛呀~ :O~
Caroline said…
http://hk.myblog.yahoo.com/chowdown-chow/article?mid=210 <-- 這也是你的Blog ma?