肺癆歌

請邊播放影片邊讀我以下這篇（多謝網友眼人熱心提供）。

原來墊檯那份報紙是再上個星期天的，我錯怪好人，我當時還衰到立即黑面旋風式走入房閉關。其實這首像七十二家房客裡頭窮編劇生肺癆必播的音樂應該送予梁老太，可憐她孤身一人來美，平日要找個人搭嘴也沒有，屈到口臭要借我口膠日日嚼。生個仔出來大大件卻只懂麻木孝順，實情粗心大意罔顧未來兩婆媳之間微妙關係，更加莫講話會識做製造機會偶爾獨享親子天倫之樂或男女朋友之歡。三人日日朝見口晚見面篤口篤鼻—不下一次我比平日遲兩小時出門口可以睡久一點梁老太竟然晨早撞門而入叫我起身，晚晚又關切地問我和梁生：「點解仲唔瞓？╱好去瞓嗱！╱聽日唔駛返學呀？？」，仲唔瞓諗來諗去都只有一個原因嗟，因為未做晒啲嘢囉，好似你咁得閒咩！而我都唔好得幾多，平日就像條頂心杉狗口長不出象牙，梁老太永遠在我二人放學回來已經準備好晚飯兼有老火湯，但我每次吃的時候還是一副食神上身嫌棄嘴臉，吃完還拍拍屁股扮家課忙推得就推唔洗碗，平日她的兒子執慣我手尾唔代表呀身嬌肉貴對手用來畫水墨畫寫大字的梁老太要倒轉頭做我們的馬姐—總之，這樣屈屈下遲早發生家庭倫常悲劇斬開梁生兩件一人一半。可是，當我多讀上一篇幾趟，又覺得自己不應該為吃睡拉這麼小的事發梁老太嘮叨，原來自己是膚淺生活的奴隸只懂眼緊吃睡拉。我只講了吃和睡的紛爭，唔爭在講埋拉，抗拒核突嘢的讀者請就此停下。話說梁老太未來前我家的馬桶一向操作正常，她來了後廁紙用多了不止五成，可能用量過盛，馬桶變得經常沖不走我的廁紙。梁老太話我摺得廁紙太細，應該學她那樣（浪費地球資源地）搣多幾張廁紙，揸埋一舊抹，這樣子就沖得走。我當然沒有跟她說的那樣做，不過次次沖不走我舊廁紙帶給我不少困擾，可能我應該識做啲，大事化小，其實點梁生去買支「通廁得」回來通通便行了，何必要藏在心裡日日埋怨「你的浪費資源搞到我沖唔走啲廁紙」令一粒塵變成一條刺呢？