整餅記

是我貪心！情人節晚餐梁生已下令吃雲吞，你別問我情人節吃雲吞是何許人習俗，如果你連續一年每次逛超市，經過冷凍粉麵櫃都有隻吊靴鬼在旁幽怨地說：「以前啱啱拍拖嗰陣，有人包雲吞我食架！」，信我，你情人節都會包雲吞。雲吞麻煩極都屬中菜，對我而言都是依司執。但我貪心，想試用我兩天前買的打蛋機，我決定勇闖死門關，整埋餅！

見識過我弄西菜的各方好友都可以（對我）舉中指發誓，我煮的西菜，真的很難吃。我曾經細心想過為什麼，我想大概西菜，尤其是烤焗類煮食，比中菜講求多一點科學。無得「差不多」、「是但」、「求其」，「亂嚟」、「鍾意落幾多就幾多」，後果會在出來那壇嘢報應給我。

為了學黎天王要贏自己，我這個下午買齊材料便著手造我的朱古力雲石芝士批。批比蛋糕容易，因為一、超市有現成的批底賣，少個步驟少樣嘢錯；二、萬一發不起來，batter都只會在批底裡下塌，無咁出醜；三、批通常不需要麵粉；四、一旦攪拌時間過長，都唔駛死。總之，批好處多籮籮，下次要扮入得廚房，請投二號–批神聖一票。

Revenons à nos moutons（新學的法俚語，意即入番正題），我懶蘇豪邊放Duke Ellington早期在哈林jungle sounds的大碟，邊用新買的打蛋機牙牙牙牙牙牙牙牙牙牙牙與那些在growling的小號鬥大聲。心想，掂喎，雖然廚房像被個用忌廉做的炸彈炸過了，但一切似模似樣。正當我沾沾自喜想仰天大笑時，我發現正倒入批底的batter有點乾，原來忘記下那四分一杯牛奶，我便連忙將batter倒回大碗。此時…批底突然裂開大大小小約三十份。



我不慌不忙拿相機拍下這畫面，然後將oreo批底與朱古力batter一起打均，我的朱古力雲石芝士批變成朱古力曲奇雲石芝士批。無辦法下我駛車衝到超市再買一個批底，沿途才想起忘記關焗爐。你話，如果因為一個批，燒了成間屋，幾唔抵。所以我在此奉勸各位扮體貼女╱男友前請三思。最後成果如何，等梁生回來一齊吃過後再報告，我現在要去包雲吞，係咁。

edit:

算係咁啦，不過勁膩，第二啖已感覺像吞下上千計的卡路里，少吃為妙。