Sunday, November 04, 2007

第一次負離子

頂,為什麼無人話我聽做負離子要咁耐?足足做了六個鐘!我整天除了飲了個茶食了個晚飯外便是恤了個髮,無端端做了阿太,時間上好奢侈呀!早知我帶些功課去讀啦,現在變相讀了五本《東方新地》,今晚一定發開口夢衛蘭減了十五磅啦!又因為平日對娛樂新聞興趣屬零的我讀了這麼多改造人╱三點式纖體╱舉起手乾一杯的廣告,加上寫啲明星如何又醜又殘╱有士啤呔╱加拿大有黑影的八掛新聞,我當時竟然走去諗,係咪應該去整吓個鼻兼削面╱減肥╱去毛?哇,好恐怖呀現在的雜誌,仲恐怖過《原振俠》裡的金石,我唔要做洪欣呀!可能你們會覺得我好土,對香港的雜誌哪用大驚少怪,其實你們有所不知啦,我根本跟那些出外留學數年回港已經講唔正廣東話的明星姐仔們一樣,是百份百鬼妹仔嘛!well,因為我不是港女,所以現在才第一次去做負離子囉。雖然我不斷安慰自己做完負離子便以後也不用打理我那連髮廊姐姐們也話好鬈的頭髮可以瞓多十五分鐘(我的頭髮整體上是直的,唯獨是後尾枕個轉位鬈得好似打風),不過現在我照鏡見到兩行死直的頭髮在臉龐兩邊,我彷彿見到徐子淇、徐子珊,但再見唔到徐子君囉。不過我又繼續安慰自己不打緊啦,現在冬天把頭髮放下來當圍巾暖暖頸也不錯,天氣熱起來時再剪短去游水,well,鬼妹仔是如此野性原始的啦。

4 comments:

HanaMaru said...

為什麼無人話我聽做負離子要咁耐?
--- 因爲你無問?? :P

Anyway,最近朋友叫我去電髮喔。雖然我有時間,但係一想起要坐向果到幾粒鈡,即刻撒手〇頭啦!(因爲現時無貢既需要)

冬冬 said...

我見到呢幅相之後﹐決定番香港時要去做搪.瓷.曲.髮!!!! 呵呵呵呵~

冬冬 said...

btw﹐我幾年前做左最後一次負離子後﹐甩頭髮甩到PK。小心小心。

新鮮人 said...

你哋真係out,
負離子無人電啦,
無物用,得個貴字.
搪瓷電鬆都幾年啦,
我哩個麻甩仔都update過你哋呀! :p