醬爆雜菌炒蜜豆

又是打邊爐剩餘物資，早前在餐館吃過一味叫醬爆杏鮑菇，又幾惹味，便在家試試。蜜豆較甜又夠嚼勁，配雜菌比荷蘭豆合適。蜜豆先沿尾巴搣走旁邊的渣，洗淨後加油鹽汆水，啤水一會待用。杏鮑菇和鮮冬菇隨喜好切片或塊（只要大小相約均勻受熱便行），同樣加油鹽汆水隔乾待用。乾蔥及薑片起鑊，下豆瓣醬及xo醬各三茶匙，爆香後把蜜豆及雜菌回鑊兜炒，攢酒下鹽調味即成。