恨到發神經

我媽最近努力工作原來是為了儲夠鐘，來三藩市。她剛問我梁生是否七月行畢業禮，我答六月。然後她立即聲音異樣在盤算什麼，「六月咩，無呀」唔知無咩，扮無辜，扮自己私底下無幻想過出席畢業禮幾百萬次「我諗住做多幾個鐘，嚟搵你地睇佢畢業嘛。」我立即一口拒絕，「人哋成家都嚟，邊有地方俾你瞓。」「吓，佢地都去咩？」然後我忍不住火起，「人哋生個仔出嚟博士畢業唔通唔去呀？」我媽還賴死「阿媽嚟但係阿爸唔嚟吓嘛？」你這個三唔識七的外人也嚷着要去梁生畢業禮，你自己話佢阿爸會唔會唔去吖？我真的很憤怒，她數天前已經打電話來問我梁生想要什麼生日禮物，我問她駛唔駛咁早問定，她話「五月喇，離七月（梁生生日月份）得兩個月咋」。上年已經是這樣子，我真不知道人家個仔生日關你鬼事，隆重其事好像皇帝出巡。最憤怒的是，上年我生日她竟然忘記了。我好想讓她明白，梁生不是她的兒子，她與梁生一點關係也沒有，每次我這樣說，她便激動「咩呀，我好錫好愛佢架，我都知佢好錫我架」。我不要她的訶諛奉承，一副我們家高攀不起梁生的樣子，一副梁生最矜貴，恨梁生是她親生仔恨到發神經的樣子。我與梁生有天分手的話，梁生睬我阿媽都傻，這樣簡單的道理不是幾十歲人還不懂吧？然後我媽知道我憤怒便在臨收線前叫我煮多啲好餸俾梁生食，我答，「我一定好得閒咩？點解要係我煮嘢俾佢食呀？我自己都好忙架。我再重申同你講，我係要我自己叻，唔係要去靠個叻嘅人，你明唔明」？